ਪ੍ਰਯਾਗਰਾਜ- ਉੱਤਰ ਪ੍ਰਦੇਸ਼ ਦੇ ਪ੍ਰਯਾਗਰਾਜ ਵਿੱਚ ਸ਼ਨੀਵਾਰ ਨੂੰ ‘ਪੌਸ਼ ਪੂਰਨਿਮਾ’ ਦੇ ਸ਼ੁਭ ਮੌਕੇ ’ਤੇ ਮਾਘ ਮੇਲੇ ਦੀ ਸ਼ੁਰੂਆਤ ਹੋ ਗਈ, ਜਿੱਥੇ ਕੜਾਕੇ ਦੀ ਠੰਢ ਅਤੇ ਸੀਤ ਲਹਿਰ ਦੇ ਬਾਵਜੂਦ ਲੱਖਾਂ ਸ਼ਰਧਾਲੂਆਂ ਨੇ ਗੰਗਾ, ਯਮੁਨਾ ਅਤੇ ਸਰਸਵਤੀ ਦੇ ਪਵਿੱਤਰ ਸੰਗਮ ਵਿੱਚ ਆਸਥਾ ਦੀ ਡੁਬਕੀ ਲਗਾਈ। ਪ੍ਰਸ਼ਾਸਨ ਮੁਤਾਬਕ ਸਵੇਰੇ 10 ਵਜੇ ਤੱਕ ਹੀ ਕਰੀਬ 9 ਲੱਖ ਸ਼ਰਧਾਲੂ ਇਸ਼ਨਾਨ ਕਰ ਚੁੱਕੇ ਸਨ ਅਤੇ ਸ਼ਾਮ ਤੱਕ ਇਹ ਗਿਣਤੀ 20 ਤੋਂ 30 ਲੱਖ ਤੱਕ ਪਹੁੰਚਣ ਦੀ ਉਮੀਦ ਹੈ।
ਇਸ ਦੇ ਨਾਲ ਹੀ ਮਹੀਨਾ ਭਰ ਚੱਲਣ ਵਾਲਾ ‘ਕਲਪਵਾਸ’ ਵੀ ਸ਼ੁਰੂ ਹੋ ਗਿਆ ਹੈ, ਜਿਸ ਵਿੱਚ ਲਗਭਗ 5 ਲੱਖ ਸ਼ਰਧਾਲੂ ਗੰਗਾ ਕੰਢੇ ਰਹਿ ਕੇ ਸਾਦਗੀ ਭਰਿਆ ਜੀਵਨ ਬਤੀਤ ਕਰਨਗੇ ਅਤੇ ਦਿਨ ਵਿੱਚ ਦੋ ਵਾਰ ਇਸ਼ਨਾਨ ਕਰਕੇ ਭਗਤੀ ਵਿੱਚ ਲੀਨ ਰਹਿਣਗੇ। ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਨੇ ਸੋਸ਼ਲ ਮੀਡੀਆ ਰਾਹੀਂ ਸ਼ਰਧਾਲੂਆਂ ਨੂੰ ਵਧਾਈ ਦਿੰਦਿਆਂ ਸਾਰਿਆਂ ਦੀ ਸੁਖ-ਸ਼ਾਂਤੀ ਦੀ ਕਾਮਨਾ ਕੀਤੀ। ਮੇਲੇ ਦੇ ਪ੍ਰਬੰਧਾਂ ਲਈ ਪ੍ਰਸ਼ਾਸਨ ਵੱਲੋਂ 10 ਹਜ਼ਾਰ ਵਰਗ ਫੁੱਟ ਵਿੱਚ 10 ਇਸ਼ਨਾਨ ਘਾਟ ਅਤੇ 9 ਪੁਲ ਤਿਆਰ ਕੀਤੇ ਗਏ ਹਨ। ਇਸ ਵਾਰ ਖ਼ਾਸ ਗੱਲ ਇਹ ਰਹੀ ਕਿ ਕਿੰਨਰ ਅਖਾੜੇ ਨੇ ਵੀ ਪਹਿਲੀ ਵਾਰ ਇਸ ਮੇਲੇ ਵਿੱਚ ‘ਕਲਪਵਾਸ’ ਸ਼ੁਰੂ ਕੀਤਾ ਹੈ। ਸ਼ਰਧਾਲੂਆਂ ਦੀ ਸਹੂਲਤ ਲਈ ‘ਪ੍ਰਯਾਗਵਾਲ’ ਨਾਮ ਦਾ ਇੱਕ ਵੱਖਰਾ ਟਾਊਨਸ਼ਿਪ ਵੀ ਵਸਾਇਆ ਗਿਆ ਹੈ। ਮਾਘ ਮੇਲੇ ਦੇ ਅਗਲੇ ਮੁੱਖ ਇਸ਼ਨਾਨ ਮਕਰ ਸੰਕ੍ਰਾਂਤੀ (14 ਜਨਵਰੀ), ਮੌਨੀ ਅਮਾਵਸਿਆ (18 ਜਨਵਰੀ) ਅਤੇ ਮਹਾਸ਼ਿਵਰਾਤਰੀ (15 ਫਰਵਰੀ) ਨੂੰ ਹੋਣਗੇ।