ਚੰਡੀਗੜ੍ਹ- ਮਸ਼ਹੂਰ ਕਾਮੇਡੀਅਨ ਭਾਰਤੀ ਸਿੰਘ ਅਤੇ ਹਰਸ਼ ਲਿੰਬਾਚੀਆ 19 ਦਸੰਬਰ ਨੂੰ ਦੂਜੀ ਵਾਰ ਮਾਪੇ ਬਣ ਗਏ ਹਨ। ਭਾਰਤੀ ਨੂੰ ਉਸ ਸਮੇਂ ਐਮਰਜੈਂਸੀ ਵਿੱਚ ਹਸਪਤਾਲ ਲਿਜਾਇਆ ਗਿਆ ਜਦੋਂ ਉਹ ਆਪਣੇ ਟੀਵੀ ਸ਼ੋਅ ‘ਲਾਫਟਰ ਸ਼ੈੱਫਸ’ ਦੀ ਸ਼ੂਟਿੰਗ ਲਈ ਤਿਆਰ ਸੀ, ਜਿਸ ਨੂੰ ਹੁਣ ਮੁਲਤਵੀ ਕਰ ਦਿੱਤਾ ਗਿਆ ਹੈ। ਹਸਪਤਾਲ ਪਹੁੰਚਣ ਤੋਂ ਬਾਅਦ ਉਨ੍ਹਾਂ ਦੇ ਘਰ ਦੂਜੇ ਬੇਟੇ ਨੇ ਜਨਮ ਲਿਆ। ਇਸ ਮੌਕੇ ਉਨ੍ਹਾਂ ਦੇ ਪਤੀ ਹਰਸ਼ ਲਿੰਬਾਚੀਆ ਉਨ੍ਹਾਂ ਦੇ ਨਾਲ ਮੌਜੂਦ ਸਨ।
ਇਸ ਜੋੜੇ ਦਾ ਪਹਿਲਾਂ ਹੀ ਇੱਕ ਵੱਡਾ ਬੇਟਾ ਹੈ ਜਿਸ ਦਾ ਨਾਂ ਲਕਸ਼ੈ ਹੈ, ਜਿਸ ਨੂੰ ਪਿਆਰ ਨਾਲ ‘ਗੋਲਾ’ ਕਿਹਾ ਜਾਂਦਾ ਹੈ। ਭਾਰਤੀ ਅਤੇ ਹਰਸ਼ ਨੇ ਸਤੰਬਰ ਵਿੱਚ ਸਵਿਟਜ਼ਰਲੈਂਡ ਦੀ ਯਾਤਰਾ ਦੌਰਾਨ ਆਪਣੀ ਦੂਜੀ ਪ੍ਰੈਗਨੈਂਸੀ ਦਾ ਐਲਾਨ ਕੀਤਾ ਸੀ। ਭਾਰਤੀ ਚਾਹੁੰਦੀ ਸੀ ਕਿ ਇਸ ਵਾਰ ਉਸ ਦੇ ਘਰ ਧੀ ਆਵੇ, ਪਰ ਕੁਦਰਤ ਨੇ ਉਸ ਨੂੰ ਫਿਰ ਤੋਂ ਪੁੱਤਰ ਦੀ ਦਾਤ ਬਖ਼ਸ਼ੀ ਹੈ।
ਪੂਰੇ ਪਰਿਵਾਰ ਵਿੱਚ ਇਸ ਸਮੇਂ ਜਸ਼ਨ ਦਾ ਮਾਹੌਲ ਹੈ। ਭਾਰਤੀ ਨੇ ਆਪਣੀ ਦੂਜੀ ਪ੍ਰੈਗਨੈਂਸੀ ਦੌਰਾਨ ਵੀ ਜੀ-ਤੋੜ ਮਿਹਨਤ ਕੀਤੀ ਅਤੇ ਹਾਲ ਹੀ ਵਿੱਚ ਆਪਣਾ ਸ਼ਾਨਦਾਰ ਮੈਟਰਨਿਟੀ ਫੋਟੋਸ਼ੂਟ ਅਤੇ ਬੇਬੀ ਸ਼ਾਵਰ ਵੀ ਕੀਤਾ ਸੀ। ਆਪਣੇ ਇੱਕ ਵਲੌਗ (Vlog) ਵਿੱਚ ਭਾਰਤੀ ਨੇ ਦੱਸਿਆ ਸੀ ਕਿ ਉਸ ਦੇ ਵੱਡੇ ਬੇਟੇ ਗੋਲਾ ਨੇ ਆਪਣੇ ਛੋਟੇ ਭਰਾ ਦਾ ਨਿੱਕ-ਨੇਮ (ਉਪਨਾਮ) ਪਹਿਲਾਂ ਹੀ ‘ਕਾਜੂ’ ਚੁਣ ਲਿਆ ਸੀ। ਹਾਲਾਂਕਿ ਭਾਰਤੀ ਨੇ ਮੰਨਿਆ ਕਿ ਉਹ ਦੋ ਬੱਚਿਆਂ ਨੂੰ ਸੰਭਾਲਣ ਨੂੰ ਲੈ ਕੇ ਥੋੜ੍ਹੀ ਘਬਰਾਹਟ ਮਹਿਸੂਸ ਕਰ ਰਹੀ ਹੈ ਕਿਉਂਕਿ ਉਹ ਚਾਹੁੰਦੀ ਹੈ ਕਿ ਦੋਵਾਂ ਬੱਚਿਆਂ ਨੂੰ ਬਰਾਬਰ ਦਾ ਪਿਆਰ ਅਤੇ ਧਿਆਨ ਮਿਲੇ। ਭਾਰਤੀ ਅਤੇ ਹਰਸ਼ 2022 ਵਿੱਚ ਪਹਿਲੀ ਵਾਰ ਮਾਪੇ ਬਣੇ ਸਨ ਅਤੇ ਹੁਣ ਉਨ੍ਹਾਂ ਦੇ ਘਰ ‘ਕਾਜੂ’ ਦੇ ਆਉਣ ਨਾਲ ਖੁਸ਼ੀਆਂ ਦੁੱਗਣੀਆਂ ਹੋ ਗਈਆਂ ਹਨ।