ਨਵੀਂ ਦਿੱਲੀ: ਭਾਰਤੀ ਫ਼ੌਜ ਨੇ ਆਪਣੀ ਵਰਦੀ ਨਾਲ ਜੁੜੇ ਨਿਯਮਾਂ ਵਿੱਚ ਇੱਕ ਵੱਡਾ ਬਦਲਾਅ ਕਰਦਿਆਂ ਤਿੰਨ ਸਾਲ ਪੁਰਾਣੇ ਉਸ ਫ਼ਰਮਾਨ ਨੂੰ ਪਲਟ ਦਿੱਤਾ ਹੈ, ਜਿਸ ਤਹਿਤ ਉੱਚ ਅਧਿਕਾਰੀਆਂ ਲਈ ਇੱਕੋ ਜਿਹੀ ਵਰਦੀ (Common Uniform) ਲਾਗੂ ਕੀਤੀ ਗਈ ਸੀ। ਇਸ ਨਵੇਂ ਫੈਸਲੇ ਤੋਂ ਬਾਅਦ ਹੁਣ ਬ੍ਰਿਗੇਡੀਅਰ ਅਤੇ ਉਸ ਤੋਂ ਉੱਪਰਲੇ ਰੈਂਕ ਦੇ ਜਰਨੈਲ ਮੁੜ ਆਪਣੀ-ਆਪਣੀ ਮੂਲ ਰੈਜੀਮੈਂਟ ਦੀ ਪਛਾਣ ਯਾਨੀ ਖਾਸ ਟੋਪੀ (Headgear), ਡੋਰੀ (Lanyard) ਅਤੇ ਹੋਰ ਰੈਜੀਮੈਂਟਲ ਚਿੰਨ੍ਹ ਪਹਿਨ ਸਕਣਗੇ।
ਜ਼ਿਕਰਯੋਗ ਹੈ ਕਿ ਸਾਲ 2023 ਵਿੱਚ ਫ਼ੌਜ ਨੇ ਸਿਖਰਲੀ ਲੀਡਰਸ਼ਿਪ ਵਿੱਚ ਏਕਤਾ ਅਤੇ ਸਾਂਝੀ ਪਛਾਣ ਨੂੰ ਉਤਸ਼ਾਹਿਤ ਕਰਨ ਦੇ ਉਦੇਸ਼ ਨਾਲ ਸੀਨੀਅਰ ਅਧਿਕਾਰੀਆਂ ਦੀ ਵਰਦੀ ਵਿੱਚੋਂ ਰੈਜੀਮੈਂਟਲ ਫ਼ਰਕ ਖ਼ਤਮ ਕਰ ਦਿੱਤੇ ਸਨ। ਹਾਲਾਂਕਿ, ਫ਼ੌਜ ਦੀਆਂ ਵੱਖ-ਵੱਖ ਰੈਜੀਮੈਂਟਾਂ ਦੀਆਂ ਇਤਿਹਾਸਕ ਪਰੰਪਰਾਵਾਂ, ਮਾਣ-ਸਨਮਾਨ ਅਤੇ ਜਵਾਨਾਂ ਨਾਲ ਭਾਵਨਾਤਮਕ ਸਾਂਝ ਨੂੰ ਮੁੱਖ ਰੱਖਦਿਆਂ ਹੁਣ ਇਸ ਨਿਯਮ ਦੀ ਮੁੜ ਸਮੀਖਿਆ ਕੀਤੀ ਗਈ ਹੈ।
ਪਰੰਪਰਾ ਅਤੇ ਮਾਣ ਦੀ ਬਹਾਲੀ ਫ਼ੌਜੀ ਹਲਕਿਆਂ ਵਿੱਚ ਇਸ ਫੈਸਲੇ ਦਾ ਭਰਵਾਂ ਸਵਾਗਤ ਕੀਤਾ ਜਾ ਰਿਹਾ ਹੈ। ਰੱਖਿਆ ਮਾਹਿਰਾਂ ਅਨੁਸਾਰ, ਭਾਰਤੀ ਫ਼ੌਜ ਵਿੱਚ ਹਰ ਰੈਜੀਮੈਂਟ ਦਾ ਆਪਣਾ ਸ਼ਾਨਾਮੱਤਾ ਇਤਿਹਾਸ ਹੁੰਦਾ ਹੈ ਅਤੇ ਰੈਜੀਮੈਂਟਲ ਚਿੰਨ੍ਹ ਅਧਿਕਾਰੀਆਂ ਤੇ ਜਵਾਨਾਂ ਵਿਚਕਾਰ ਅਟੁੱਟ ਰਿਸ਼ਤੇ ਅਤੇ ਮਾਣ ਦਾ ਪ੍ਰਤੀਕ ਹੁੰਦੇ ਹਨ। ਤਿੰਨ ਸਾਲਾਂ ਬਾਅਦ ਮੁੜ ‘ਰੈਜੀਮੈਂਟਲ ਰੰਗ’ ਬਹਾਲ ਹੋਣ ਨਾਲ ਫ਼ੌਜੀ ਪਰੰਪਰਾਵਾਂ ਨੂੰ ਹੋਰ ਮਜ਼ਬੂਤੀ ਮਿਲੇਗੀ।
