ਪਟਿਆਲਾ- ਪਟਿਆਲਾ ਦੇ ਸਭ ਤੋਂ ਰੁਝੇਵਿਆਂ ਵਾਲੇ ‘22 ਨੰਬਰ ਫਲਾਈਓਵਰ’ ’ਤੇ ਲੋਕ ਨਿਰਮਾਣ ਵਿਭਾਗ (PWD) ਦੀ ਵੱਡੀ ਲਾਪਰਵਾਹੀ ਕਾਰਨ ਸੈਂਕੜੇ ਸਕੂਲੀ ਵਿਦਿਆਰਥੀ ਅਤੇ ਦਫ਼ਤਰ ਜਾਣ ਵਾਲੇ ਲੋਕ ਘੰਟਿਆਂ ਬੱਧੀ ਜਾਮ ਵਿੱਚ ਫਸੇ ਰਹੇ। ਦਰਅਸਲ, PWD ਵੱਲੋਂ ਫਲਾਈਓਵਰ ਦੀ ਮੁਰੰਮਤ ਦਾ ਕੰਮ ਸ਼ੁਰੂ ਕੀਤਾ ਗਿਆ ਸੀ, ਜਿਸ ਦੌਰਾਨ ਉਸਾਰੀ ਸਮੱਗਰੀ ਨਾਲ ਲੱਦਿਆ ਇੱਕ ਟਰੱਕ ਸੜਕ ਦੇ ਬਿਲਕੁਲ ਵਿਚਕਾਰ ਖੜ੍ਹਾ ਕਰ ਦਿੱਤਾ ਗਿਆ। ਇਸ ਕਾਰਨ ਲੱਗੇ ਜਾਮ ਕਾਰਨ ਬੋਰਡ ਦੀਆਂ ਪ੍ਰੀਖਿਆਵਾਂ ਦੇਣ ਜਾ ਰਹੇ ਕਈ ਵਿਦਿਆਰਥੀ ਰੋਣ ਲਈ ਮਜਬੂਰ ਹੋ ਗਏ।
ਮਾਪਿਆਂ ਨੇ ਦੱਸਿਆ ਕਿ 9 ਵਜੇ ਪੇਪਰ ਹੋਣ ਦੇ ਬਾਵਜੂਦ ਉਹ ਜਾਮ ਵਿੱਚ ਫਸੇ ਰਹੇ, ਜਿਸ ਕਾਰਨ ਬੱਚਿਆਂ ਵਿੱਚ ਭਾਰੀ ਦਹਿਸ਼ਤ ਦੇਖਣ ਨੂੰ ਮਿਲੀ। ਹੈਰਾਨੀ ਦੀ ਗੱਲ ਇਹ ਰਹੀ ਕਿ ਵੀ.ਆਈ.ਪੀ. ਡਿਊਟੀਆਂ ਵਿੱਚ ਮੁਸਤੈਦ ਰਹਿਣ ਵਾਲੀ ਟਰੈਫਿਕ ਪੁਲੀਸ ਮੌਕੇ ਤੋਂ ਗਾਇਬ ਸੀ। ਗੁੱਸੇ ਵਿੱਚ ਆਏ ਮਾਪਿਆਂ ਨੇ ਸਵਾਲ ਉਠਾਇਆ ਕਿ ਸਕੂਲ ਅਤੇ ਕਾਲਜ ਦੇ ਪੀਕ ਸਮੇਂ ਦੌਰਾਨ ਸ਼ਹਿਰ ਦੇ ਅੰਦਰ ਭਾਰੀ ਟਰੱਕ ਨੂੰ ਵੜਨ ਦੀ ਇਜਾਜ਼ਤ ਕਿਵੇਂ ਦਿੱਤੀ ਗਈ। ਟਰੈਫਿਕ ਇੰਚਾਰਜ ਜਪਨਾਮ ਸਿੰਘ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਨੇ PWD ਨੂੰ ਭੀੜ ਵਾਲੇ ਸਮੇਂ ਕੰਮ ਨਾ ਕਰਨ ਦੀ ਬੇਨਤੀ ਕੀਤੀ ਸੀ, ਪਰ ਉਹ ਇਹ ਸਪੱਸ਼ਟ ਨਹੀਂ ਕਰ ਸਕੇ ਕਿ ਟਰੱਕ ਸ਼ਹਿਰ ਅੰਦਰ ਕਿਵੇਂ ਆਇਆ।
ਦੂਜੇ ਪਾਸੇ, PWD ਦੇ ਐਕਸੀਅਨ ਪਿਊਸ਼ ਅਗਰਵਾਲ ਨੇ ਮਾਮਲੇ ਤੋਂ ਅਣਜਾਣਤਾ ਪ੍ਰਗਟਾਈ ਹੈ। ਪਰੇਸ਼ਾਨ ਮਾਪਿਆਂ ਨੇ ਹੁਣ ਡਿਪਟੀ ਕਮਿਸ਼ਨਰ ਅਤੇ ਐਸ.ਐਸ.ਪੀ. ਤੋਂ ਇਸ ਲਾਪਰਵਾਹੀ ਲਈ ਜ਼ਿੰਮੇਵਾਰ ਅਧਿਕਾਰੀਆਂ ਖਿਲਾਫ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ ਹੈ ਤਾਂ ਜੋ ਭਵਿੱਖ ਵਿੱਚ ਵਿਦਿਆਰਥੀਆਂ ਦੇ ਭਵਿੱਖ ਨਾਲ ਅਜਿਹਾ ਖਿਲਵਾੜ ਨਾ ਹੋਵੇ।