ਮੁੰਬਈ: ਬਾਲੀਵੁੱਡ ਦੀ ਚੋਟੀ ਦੀ ਅਦਾਕਾਰਾ ਆਲੀਆ ਭੱਟ ਅਕਸਰ ਆਪਣੀਆਂ ਫ਼ਿਲਮਾਂ ਅਤੇ ਸਟਾਈਲ ਨੂੰ ਲੈ ਕੇ ਸੁਰਖੀਆਂ ਵਿੱਚ ਰਹਿੰਦੀ ਹੈ। ਪਰ ਇਸ ਵਾਰ ਉਹ ਸੋਸ਼ਲ ਮੀਡੀਆ ‘ਤੇ ਟ੍ਰੋਲਰਜ਼ ਨੂੰ ਦਿੱਤੇ ਆਪਣੇ ਬੇਬਾਕ ਅਤੇ ਕਰਾਰੇ ਜਵਾਬ ਕਰਕੇ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ। ਪਿਛਲੇ ਕੁਝ ਦਿਨਾਂ ਤੋਂ ਇੰਟਰਨੈੱਟ ‘ਤੇ ਲਗਾਤਾਰ ਨਿਸ਼ਾਨਾ ਬਣਾ ਰਹੇ ਟ੍ਰੋਲਰਜ਼ ਦੀ ਬੋਲਤੀ ਬੰਦ ਕਰਦਿਆਂ ਆਲੀਆ ਨੇ ਸਾਫ਼ ਕਹਿ ਦਿੱਤਾ ਹੈ ਕਿ ਉਸ ਨੂੰ ਨਫ਼ਰਤ ਕਰਨ ਵਾਲਿਆਂ ਦੀ ਕੋਈ ਪਰਵਾਹ ਨਹੀਂ ਹੈ।
ਸੋਸ਼ਲ ਮੀਡੀਆ ਪੋਸਟ ਰਾਹੀਂ ਕੱਢੀ ਭੜਾਸ- ਆਲੀਆ ਭੱਟ ਨੇ ਆਪਣੇ ਅਧਿਕਾਰਤ ਇੰਸਟਾਗ੍ਰਾਮ ਅਕਾਊਂਟ ‘ਤੇ ਇੱਕ ਸਟੋਰੀ ਸਾਂਝੀ ਕਰਦਿਆਂ ਵਿਅੰਗਆਤਮਕ ਲਹਿਜੇ ਵਿੱਚ ਲਿਖਿਆ, “ਤਰਸ ਕਿਉਂ ਪਿਆਰੇ? ਤੁਸੀਂ ਤਾਂ ਮੈਨੂੰ ਨੋਟਿਸ ਕਰ ਹੀ ਲਿਆ।” ਅਦਾਕਾਰਾ ਨੇ ਅੱਗੇ ਲਿਖਿਆ ਕਿ ਜਿਹੜੇ ਲੋਕ ਦਿਨ-ਰਾਤ ਉਸ ਦੀਆਂ ਕਮੀਆਂ ਲੱਭਣ ਅਤੇ ਉਸ ਨੂੰ ਟ੍ਰੋਲ ਕਰਨ ਵਿੱਚ ਬਿਤਾਉਂਦੇ ਹਨ, ਅਸਲ ਵਿੱਚ ਉਹ ਆਪਣਾ ਕੀਮਤੀ ਸਮਾਂ ਉਸ ਨੂੰ ਹੀ ਦੇ ਰਹੇ ਹਨ। ਆਲੀਆ ਨੇ ਟ੍ਰੋਲਰਜ਼ ਨੂੰ ਚੁਟਕੀ ਲੈਂਦਿਆਂ ਕਿਹਾ, “ਮੇਰੀ ਚਿੰਤਾ ਛੱਡੋ, ਤੁਹਾਡਾ ਪੂਰਾ ਧਿਆਨ ਤਾਂ ਮੇਰੇ ‘ਤੇ ਹੀ ਹੈ ਅਤੇ ਇਹੀ ਮੇਰੀ ਸਭ ਤੋਂ ਵੱਡੀ ਜਿੱਤ ਹੈ।”
ਦਰਅਸਲ, ਇਹ ਵਿਵਾਦ ਉਦੋਂ ਸ਼ੁਰੂ ਹੋਇਆ ਜਦੋਂ ਹਾਲ ਹੀ ਵਿੱਚ ਆਲੀਆ ਭੱਟ ਇੱਕ ਇੰਟਰਨੈਸ਼ਨਲ ਬ੍ਰਾਂਡ ਦੇ ਇਵੈਂਟ ਵਿੱਚ ਸ਼ਾਮਲ ਹੋਈ ਸੀ। ਉੱਥੇ ਉਸ ਦੇ ਲੁੱਕ, ਬੈਠਣ ਦੇ ਅੰਦਾਜ਼ ਅਤੇ ਇੰਟਰਵਿਊ ਦੌਰਾਨ ਉਸ ਦੇ ਬੋਲਣ ਦੇ ਤਰੀਕੇ (Body Language) ਨੂੰ ਲੈ ਕੇ ਕੁਝ ਸੋਸ਼ਲ ਮੀਡੀਆ ਯੂਜ਼ਰਸ ਨੇ ਉਸ ਨੂੰ ਬੁਰੀ ਤਰ੍ਹਾਂ ਟ੍ਰੋਲ ਕਰਨਾ ਸ਼ੁਰੂ ਕਰ ਦਿੱਤਾ ਸੀ। ਕੁਝ ਲੋਕਾਂ ਨੇ ਉਸ ਦੀ ਤੁਲਨਾ ਹੋਰਨਾਂ ਅਦਾਕਾਰਾਵਾਂ ਨਾਲ ਕਰਦਿਆਂ ਭੱਦੇ ਕਮੈਂਟਸ ਵੀ ਕੀਤੇ ਸਨ। ਆਮ ਤੌਰ ‘ਤੇ ਅਜਿਹੀਆਂ ਗੱਲਾਂ ‘ਤੇ ਚੁੱਪ ਰਹਿਣ ਵਾਲੀ ਆਲੀਆ ਨੇ ਇਸ ਵਾਰ ਚੁੱਪੀ ਤੋੜਨਾ ਹੀ ਮੁਨਾਸਿਬ ਸਮਝਿਆ।
ਪ੍ਰਸ਼ੰਸਕਾਂ ਅਤੇ ਸਿਤਾਰਿਆਂ ਨੇ ਦਿੱਤਾ ਸਾਥ-ਆਲੀਆ ਭੱਟ ਦੇ ਇਸ ਠੋਕਵੇਂ ਜਵਾਬ ਤੋਂ ਬਾਅਦ ਉਸ ਦੇ ਪ੍ਰਸ਼ੰਸਕ (Fans) ਲਗਾਤਾਰ ਉਸ ਦੇ ਸਮਰਥਨ ਵਿੱਚ ਪੋਸਟਾਂ ਪਾ ਰਹੇ ਹਨ। ਪ੍ਰਸ਼ੰਸਕਾਂ ਦਾ ਕਹਿਣਾ ਹੈ ਕਿ ਸੋਸ਼ਲ ਮੀਡੀਆ ‘ਤੇ ਸਿਤਾਰਿਆਂ ਨੂੰ ਬਿਨਾਂ ਵਜ੍ਹਾ ਨਿਸ਼ਾਨਾ ਬਣਾਉਣਾ ਇੱਕ ਫੈਸ਼ਨ ਬਣ ਗਿਆ ਹੈ ਅਤੇ ਆਲੀਆ ਨੇ ਅਜਿਹੇ ਲੋਕਾਂ ਨੂੰ ਬਿਲਕੁਲ ਸਹੀ ਸਬਕ ਸਿਖਾਇਆ ਹੈ। ਬਾਲੀਵੁੱਡ ਦੇ ਕਈ ਹੋਰ ਸਿਤਾਰਿਆਂ ਨੇ ਵੀ ਆਲੀਆ ਦੀ ਇਸ ਪੋਸਟ ਨੂੰ ਪਸੰਦ ਕਰਦਿਆਂ ਉਸ ਦੀ ਨਿਡਰਤਾ ਦੀ ਤਾਰੀਫ਼ ਕੀਤੀ ਹੈ।