ਨਵੀਂ ਦਿੱਲੀ- ਸੰਨੀ ਦਿਓਲ ਦੀ ਵਾਰ ਡਰਾਮਾ ਫਿਲਮ ‘ਬਾਰਡਰ 2’ ਨੇ 23 ਜਨਵਰੀ ਨੂੰ ਬਾਕਸ ਆਫਿਸ ‘ਤੇ ਦਸਤਕ ਦਿੱਤੀ ਅਤੇ ਸ਼ਾਨਦਾਰ ਓਪਨਿੰਗ ਕੀਤੀ। ਫਿਲਮ ਘਰੇਲੂ ਅਤੇ ਵਿਸ਼ਵ ਪੱਧਰ ‘ਤੇ ਜ਼ਬਰਦਸਤ ਕਮਾਈ ਕਰ ਰਹੀ ਹੈ। ਆਓ ਜਾਣਦੇ ਹਾਂ ਪਹਿਲੇ ਵੀਕੈਂਡ ‘ਤੇ ਫਿਲਮ ਨੇ ਦੁਨੀਆ ਭਰ ਵਿੱਚ ਕਿੰਨੀ ਕਮਾਈ ਕੀਤੀ।
ਬਾਰਡਰ 2 ਬਾਕਸ ਆਫਿਸ ਕਲੈਕਸ਼ਨ- ‘ਬਾਰਡਰ 2’ ਨੇ ਰਿਲੀਜ਼ ਦੇ ਪਹਿਲੇ ਦਿਨ ਚੰਗੀ ਸ਼ੁਰੂਆਤ ਕੀਤੀ; ਕਈ ਮੋਰਨਿੰਗ ਸ਼ੋਅ ਰੱਦ ਹੋਣ ਦੇ ਬਾਵਜੂਦ ਫਿਲਮ ਨੇ ਪਹਿਲੇ ਦਿਨ ₹30 ਕਰੋੜ ਨੈੱਟ ਕਮਾਏ। ਸ਼ਨੀਵਾਰ ਨੂੰ ਫਿਲਮ ਦੀ ਕਮਾਈ ਵਿੱਚ ਉਛਾਲ ਦੇਖਣ ਨੂੰ ਮਿਲਿਆ ਅਤੇ ਇਸ ਨੇ 36.5 ਕਰੋੜ ਦਾ ਕਾਰੋਬਾਰ ਕੀਤਾ। ਐਤਵਾਰ ਨੂੰ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਫਿਲਮ ਨੇ 54.50 ਕਰੋੜ ਨੈੱਟ ਕਮਾਏ। ਅਨੁਰਾਗ ਸਿੰਘ ਦੀ ਇਸ ਫਿਲਮ ਨੇ ਆਪਣੇ ਪਹਿਲੇ ਵੀਕੈਂਡ ਵਿੱਚ ਭਾਰਤ ਵਿੱਚ ਕੁੱਲ ₹121 ਕਰੋੜ ਦਾ ਨੈੱਟ ਕਲੈਕਸ਼ਨ ਕਰ ਲਿਆ ਹੈ।
ਬਾਰਡਰ 2 ਵਰਲਡਵਾਈਡ ਕਲੈਕਸ਼ਨ- ਜੇਕਰ ‘ਬਾਰਡਰ 2’ ਦੀ ਦੁਨੀਆ ਭਰ ਵਿੱਚ ਹੋਈ ਕਮਾਈ ਦੀ ਗੱਲ ਕਰੀਏ, ਤਾਂ ਇਸ ਨੇ ਪਹਿਲੇ ਵੀਕੈਂਡ ‘ਤੇ ਹੀ 150 ਕਰੋੜ ਦਾ ਅੰਕੜਾ ਪਾਰ ਕਰ ਲਿਆ ਹੈ। ਫਿਲਮ ਨੇ ਹੁਣ ਤੱਕ ਵਰਲਡਵਾਈਡ 158.5 ਕਰੋੜ ਦੀ ਕਮਾਈ ਕਰ ਲਈ ਹੈ। ਫਿਲਮ ਨੇ ਵਿਦੇਸ਼ਾਂ ਵਿੱਚ 16 ਕਰੋੜ ਅਤੇ ਭਾਰਤ ਵਿੱਚ 142.5 ਕਰੋੜ ਦਾ ਗ੍ਰੌਸ ਕਲੈਕਸ਼ਨ ਕੀਤਾ ਹੈ।
‘ਜਾਟ’ ਦੇ ਲਾਈਫਟਾਈਮ ਕਲੈਕਸ਼ਨ ਨੂੰ ਪਛਾੜਿਆ- ਫਿਲਮ ਦੀ ਰਫ਼ਤਾਰ ਨੂੰ ਦੇਖਦੇ ਹੋਏ ਸੰਨੀ ਦਿਓਲ ਸਟਾਰਰ ਇਹ ਫਿਲਮ ਜਲਦੀ ਹੀ ਚੋਟੀ ਦੇ ਮੁਕਾਮ ‘ਤੇ ਪਹੁੰਚ ਜਾਵੇਗੀ। ਐਤਵਾਰ ਨੂੰ ‘ਬਾਰਡਰ 2’ ਨੇ ਸੰਨੀ ਦਿਓਲ ਦੀ ਪਿਛਲੀ ਫਿਲਮ ‘ਜਾਟ’ ਦੇ ਲਾਈਫਟਾਈਮ ਕਲੈਕਸ਼ਨ ਨੂੰ ਪਿੱਛੇ ਛੱਡ ਦਿੱਤਾ ਹੈ, ਜਿਸ ਨੇ ਪਿਛਲੇ ਸਾਲ ਦੁਨੀਆ ਭਰ ਵਿੱਚ ਲਗਭਗ ₹120 ਕਰੋੜ ਕਮਾਏ ਸਨ।
ਫਿਲਮ ‘ਬਾਰਡਰ 2’ ਬਾਰੇ ਖ਼ਾਸ ਜਾਣਕਾਰੀ- ਭੂਸ਼ਣ ਕੁਮਾਰ, ਕ੍ਰਿਸ਼ਨ ਕੁਮਾਰ, ਜੇ.ਪੀ. ਦੱਤਾ ਅਤੇ ਨਿਧੀ ਦੱਤਾ ਦੁਆਰਾ ਨਿਰਮਿਤ ਫਿਲਮ ‘ਬਾਰਡਰ 2’ ਵਿੱਚ ਸੰਨੀ ਦਿਓਲ ਦੇ ਨਾਲ-ਨਾਲ ਵਰੁਣ ਧਵਨ, ਦਿਲਜੀਤ ਦੋਸਾਂਝ, ਅਹਾਨ ਸ਼ੈੱਟੀ, ਮੋਨਾ ਸਿੰਘ, ਸੋਨਮ ਬਾਜਵਾ ਅਤੇ ਅਨਿਆ ਸਿੰਘ ਵੀ ਅਹਿਮ ਭੂਮਿਕਾਵਾਂ ਵਿੱਚ ਨਜ਼ਰ ਆ ਰਹੇ ਹਨ। ਇਹ ਫਿਲਮ ਸਾਲ 2026 ਵਿੱਚ ਬਾਲੀਵੁੱਡ ਦੀ ਪਹਿਲੀ ਸਭ ਤੋਂ ਵੱਡੀ ਫਿਲਮ ਰਿਲੀਜ਼ ਹੈ।