ਚੰਡੀਗੜ੍ਹ- ਭਾਰਤੀ ਜਨਤਾ ਪਾਰਟੀ (BJP) ਨੇ ਬੁੱਧਵਾਰ ਨੂੰ ਨਗਰ ਨਿਗਮ ਚੋਣਾਂ ਵਿੱਚ ਹੂੰਝਾ ਫੇਰ ਜਿੱਤ ਹਾਸਲ ਕਰਦਿਆਂ ਅੰਬਾਲਾ ਅਤੇ ਸੋਨੀਪਤ ਵਿੱਚ ਸ਼ਾਨਦਾਰ ਜਿੱਤ ਦਰਜ ਕੀਤੀ ਹੈ ਅਤੇ ਪੰਚਕੂਲਾ ਵਿੱਚ ਅਜੇਤੂ ਬੜ੍ਹਤ ਬਣਾ ਲਈ ਹੈ। ਭਾਜਪਾ ਨੇ ਹੋਰਨਾਂ ਸਥਾਨਕ ਇਕਾਈਆਂ ਦੀਆਂ ਚੋਣਾਂ ਵਿੱਚ ਵੀ ਸਫ਼ਲਤਾ ਹਾਸਲ ਕੀਤੀ ਅਤੇ ਸਾਬਕਾ ਮੁੱਖ ਮੰਤਰੀ ਭੁਪਿੰਦਰ ਸਿੰਘ ਹੁੱਡਾ ਦੇ ਗੜ੍ਹ ਮੰਨੇ ਜਾਂਦੇ ਸਾਂਪਲਾ ਨਗਰ ਕਮੇਟੀ ਵਿੱਚ ਪ੍ਰਧਾਨ ਦੀ ਸੀਟ ‘ਤੇ ਕਬਜ਼ਾ ਕੀਤਾ। ਜ਼ਿਕਰ ਯੋਗ ਹੈ ਕਿ ਕਾਂਗਰਸ ਨੇ ਸਾਂਪਲਾ ਵਿੱਚ ਸਥਾਨਕ ਚੋਣਾਂ ਲਈ ਆਪਣਾ ਉਮੀਦਵਾਰ ਨਹੀਂ ਉਤਾਰਿਆ ਸੀ। ਇਸ ਦੌਰਾਨ ਭਾਜਪਾ ਕੈਂਪ ਵਿੱਚ ਜਸ਼ਨ ਦਾ ਮਾਹੌਲ ਬਣ ਗਿਆ, ਜਿੱਥੇ ਪਾਰਟੀ ਵਰਕਰਾਂ ਅਤੇ ਆਗੂਆਂ ਨੇ ਮਿਠਾਈਆਂ ਵੰਡੀਆਂ।
ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੇ ਨਗਰ ਨਿਗਮ ਚੋਣਾਂ ਵਿੱਚ ਭਾਜਪਾ ਦੇ ਇਸ ਸ਼ਾਨਦਾਰ ਪ੍ਰਦਰਸ਼ਨ ਦੀ ਸ਼ਲਾਘਾ ਕੀਤੀ, ਜੋ ਪੱਛਮੀ ਬੰਗਾਲ ਅਤੇ ਅਸਾਮ ਵਿੱਚ ਪਾਰਟੀ ਦੀਆਂ ਵੱਡੀਆਂ ਜਿੱਤਾਂ ਤੋਂ ਤੁਰੰਤ ਬਾਅਦ ਆਇਆ ਹੈ। ਉਨ੍ਹਾਂ ਕਿਹਾ ਕਿ ਲੋਕਾਂ ਨੇ ਇੱਕ ਵਾਰ ਫਿਰ ਨਰਿੰਦਰ ਮੋਦੀ ਦੀ ਅਗਵਾਈ ਵਾਲੀ ਸਰਕਾਰ ਦੀਆਂ ਨੀਤੀਆਂ ਅਤੇ ਪ੍ਰੋਗਰਾਮਾਂ ‘ਤੇ ਆਪਣੀ ਮੋਹਰ ਲਗਾਈ ਹੈ ਅਤੇ ਭਰੋਸਾ ਪ੍ਰਗਟਾਇਆ ਹੈ। ਸੈਣੀ ਨੇ ਕਾਂਗਰਸ ‘ਤੇ ਨਿਸ਼ਾਨਾ ਸਾਧਦਿਆਂ ਕਿਹਾ ਕਿ ਲੋਕਾਂ ਨੇ ਉਨ੍ਹਾਂ ਨੂੰ ਮੁੜ ਨਕਾਰ ਦਿੱਤਾ ਹੈ। ਉਨ੍ਹਾਂ ਕਿਹਾ, “ਕਾਂਗਰਸ ਹਮੇਸ਼ਾ ਝੂਠ ਦਾ ਸਹਾਰਾ ਲੈਂਦੀ ਹੈ, ਲੋਕ ਇਹ ਸਮਝ ਚੁੱਕੇ ਹਨ,” ਉਨ੍ਹਾਂ ਅੱਗੇ ਕਿਹਾ ਕਿ ਪੁਰਾਣੀ ਪਾਰਟੀ ਦਾ “ਅਸਲੀ ਚਿਹਰਾ ਬੇਨਕਾਬ ਹੋ ਗਿਆ ਹੈ”। ਹੁੱਡਾ ਦੇ ਗੜ੍ਹ ਸਾਂਪਲਾ ਵਿੱਚ ਭਾਜਪਾ ਦੀ ਜਿੱਤ ‘ਤੇ ਸੈਣੀ ਨੇ ਕਿਹਾ, “ਲੋਕ ਹੁਣ ਹੁੱਡਾ ‘ਤੇ ਭਰੋਸਾ ਨਹੀਂ ਕਰਦੇ। ਉਹ ਝੂਠ ਬੋਲਦੇ ਹਨ।” ਮੁੱਖ ਮੰਤਰੀ ਨੇ ਕਿਹਾ, “ਸਾਡੀ ਸਰਕਾਰ ਇਮਾਨਦਾਰੀ ਅਤੇ ਪਾਰਦਰਸ਼ਤਾ ਨਾਲ ਕੰਮ ਕਰ ਰਹੀ ਹੈ ਅਤੇ ਲੋਕਾਂ ਨਾਲ ਕੀਤੇ ਵਾਅਦੇ ਪੂਰੇ ਕਰ ਰਹੀ ਹੈ।”
ਅਧਿਕਾਰਤ ਰੁਝਾਨਾਂ ਅਨੁਸਾਰ ਅੰਬਾਲਾ ਮੇਅਰ ਦੀ ਸੀਟ ਲਈ ਭਾਜਪਾ ਦੀ ਅਕਸ਼ਿਤਾ ਸੈਣੀ ਨੇ ਆਪਣੀ ਕਾਂਗਰਸੀ ਵਿਰੋਧੀ ਕੁਲਵਿੰਦਰ ਕੌਰ ਨੂੰ 21,358 ਵੋਟਾਂ ਦੇ ਫਰਕ ਨਾਲ ਹਰਾਇਆ। ਆਜ਼ਾਦ ਉਮੀਦਵਾਰ ਸੋਨੀਆ ਰਾਣੀ ਤੀਜੇ ਸਥਾਨ ‘ਤੇ ਰਹੀ। ਪੰਚਕੂਲਾ ਵਿੱਚ ਭਾਜਪਾ ਦੇ ਸ਼ਿਆਮਲਾਲ ਬਾਂਸਲ ਨੇ ਮੇਅਰ ਦੀ ਸੀਟ ਲਈ ਕਾਂਗਰਸ ਦੀ ਸੁਧਾ ਭਾਰਦਵਾਜ ‘ਤੇ ਅਜੇਤੂ ਬੜ੍ਹਤ ਬਣਾ ਲਈ ਹੈ, ਜਦਕਿ ‘ਆਪ’ ਦੇ ਰਾਜੇਸ਼ ਕੁਮਾਰ ਤੀਜੇ ਸਥਾਨ ‘ਤੇ ਹਨ। ਸੋਨੀਪਤ ਵਿੱਚ ਮੇਅਰ ਦੀ ਸੀਟ ਲਈ ਭਾਜਪਾ ਦੇ ਰਾਜੀਵ ਜੈਨ ਨੇ ਆਪਣੇ ਕਾਂਗਰਸੀ ਵਿਰੋਧੀ ਕਮਲ ਦੀਵਾਨ ਨੂੰ 23,247 ਵੋਟਾਂ ਨਾਲ ਹਰਾਇਆ। ਇਨੈਲੋ (INLD) ਦੇ ਆਨੰਦ ਕੁਮਾਰ ਤੀਜੇ ਸਥਾਨ ‘ਤੇ ਪਛੜ ਗਏ।
ਵਰਤਮਾਨ ਵਿੱਚ, ਪੰਚਕੂਲਾ, ਅੰਬਾਲਾ ਅਤੇ ਸੋਨੀਪਤ ਦੇ ਤਿੰਨ ਨਗਰ ਨਿਗਮਾਂ ਵਿੱਚ ਮੌਜੂਦਾ ਮੇਅਰ ਭਾਜਪਾ ਤੋਂ ਹਨ। ਸਾਂਪਲਾ ਨਗਰ ਕਮੇਟੀ ਵਿੱਚ ਭਾਜਪਾ ਦੇ ਪ੍ਰਵੀਨ ਨੇ ਆਜ਼ਾਦ ਉਮੀਦਵਾਰ ਅੰਕਿਤ ਨੂੰ 687 ਵੋਟਾਂ ਨਾਲ ਹਰਾਇਆ। ਧਾਰੂਹੇੜਾ ਵਿੱਚ ਭਾਜਪਾ ਦੇ ਸਤਿਆਨਾਰਾਇਣ ਉਰਫ਼ ਅਜੈ ਜਾਂਗੜਾ ਨੇ ਆਜ਼ਾਦ ਉਮੀਦਵਾਰ ਬਾਬੂ ਲਾਲ ਨੂੰ 6,236 ਵੋਟਾਂ ਨਾਲ ਹਰਾਇਆ, ਜਦਕਿ ਕਾਂਗਰਸ ਤੀਜੇ ਸਥਾਨ ‘ਤੇ ਰਹੀ। ਹਾਲਾਂਕਿ, ਉਕਲਾਨਾ ਵਿੱਚ ਭਾਜਪਾ ਉਮੀਦਵਾਰ ਨਿਕਿਤਾ ਗੋਇਲ ਆਜ਼ਾਦ ਉਮੀਦਵਾਰ ਰੀਮਾ ਸੋਨੀ ਤੋਂ 2,806 ਵੋਟਾਂ ਨਾਲ ਹਾਰ ਗਈ। ਰੇਵਾੜੀ ਨਗਰ ਕੌਂਸਲ ਵਿੱਚ ਭਾਜਪਾ ਦੀ ਵਿਨੀਤਾ ਪਿੱਪਲ ਨੇ ਕਾਂਗਰਸ ਦੀ ਨਿਹਾਰਿਕਾ ਨੂੰ 21,445 ਵੋਟਾਂ ਨਾਲ ਹਰਾਇਆ।
ਅੰਬਾਲਾ ਨਗਰ ਕੌਂਸਲ ਵਿੱਚ ਭਾਜਪਾ ਨੇ 16 ਵਾਰਡ ਜਿੱਤੇ, ਤਿੰਨ ਕਾਂਗਰਸ ਦੇ ਹਿੱਸੇ ਆਏ, ਜਦਕਿ ਇੱਕ ਵਾਰਡ ਵਿੱਚ ਆਜ਼ਾਦ ਉਮੀਦਵਾਰ ਜੇਤੂ ਰਿਹਾ। ਸੋਨੀਪਤ ਨਗਰ ਕੌਂਸਲ ਵਿੱਚ ਭਾਜਪਾ ਨੇ 17 ਵਾਰਡ ਹਾਸਲ ਕੀਤੇ ਜਦਕਿ ਕਾਂਗਰਸ ਨੇ ਪੰਜ ਵਾਰਡਾਂ ਵਿੱਚ ਜਿੱਤ ਦਰਜ ਕੀਤੀ। ਕੁਝ ਮਿਊਂਸਪਲ ਵਾਰਡਾਂ ਵਿੱਚ ਕਾਂਗਰਸੀ ਉਮੀਦਵਾਰ ਆਜ਼ਾਦ ਉਮੀਦਵਾਰਾਂ ਤੋਂ ਵੀ ਪਿੱਛੇ ਰਹੇ। ਪੰਚਕੂਲਾ ਨਗਰ ਕੌਂਸਲ ਵਿੱਚ ਵੋਟਾਂ ਦੀ ਗਿਣਤੀ ਜਾਰੀ ਸੀ, ਜਿੱਥੇ ਭਾਜਪਾ ਹੁਣ ਤੱਕ 10 ਵਾਰਡ ਜਿੱਤ ਚੁੱਕੀ ਹੈ।