ਚੰਡੀਗੜ੍ਹ- ਸਾਬਕਾ ਸਪੀਕਰ ਤੇ ਕਾਂਗਰਸੀ ਆਗੂ ਰਾਣਾ ਕੇ.ਪੀ ਸਿੰਘ ਵੱਲੋਂ ਪੰਜਾਬੀਆਂ ਪ੍ਰਤੀ ਦਿੱਤੇ ਗਏ ਬਿਆਨ ਨੂੰ ਲੈ ਕੇ ਪੰਜਾਬ ਦੀ ਸਿਆਸਤ ਭਖੀ ਹੋਈ ਹੈ। ਇਸ ਬਿਆਨ ਤੇ ਆਪਣਾ ਤਿੱਖਾ ਪ੍ਰਤੀਕਰਮ ਦਿੰਦੇ ਹੋਏ ਭਾਜਪਾ ਦੇ ਬੁਲਾਰੇ ਪ੍ਰਿਤਪਾਲ ਸਿੰਘ ਬੱਲੀਏਵਾਲ ਨੇ ਕਿਹਾ ਕਿ ਪੰਜਾਬੀਆਂ ਦੀ ਤੁਲਨਾ ਸੱਪ ਤੇ ਨਿਓਲੇ ਨਾਲ ਕੀਤੇ ਜਾਣਾ ਕਾਂਗਰਸ ਦੀ ਘਟੀਆ ਸੋਚ ਨੂੰ ਦਰਸਾਉਂਦਾ ਹੈ। ਬੱਲੀਏਵਾਲ ਨੇ ਇਸ ਬਿਆਨ ਤੇ ਟਵੀਟ ਕਰਦੇ ਹੋਏ ਲਿਖਿਆ ਕਿ “ਰਾਣਾ ਜੀ ਤੇ ਵੀ ਲੱਗਦਾ ਸੰਗਤ ਦਾ ਅਸਰ ਪੈ ਗਿਆ ਹੈ”। ਬੱਲੀਏਵਾਲ ਨੇ ਕਿਹਾ ਕਿ ਕਾਂਗਰਸੀ ਆਗੂਆਂ ਵੱਲੋਂ ਕਦੇ ਦਲਿਤਾਂ ਬਾਰੇ, ਕਦੇ ਸਿੱਖਾਂ ਬਾਰੇ, ਕਦੇ ਪੰਜਾਬੀਆਂ ਨੂੰ ਗੱਦਾਰ ਕਹਿਣਾ ਤੇ ਹੁਣ ਪੰਜਾਬੀਆਂ ਬਾਰੇ ਕੀਤੀ ਗਈ ਇਹ ਘਟੀਆ ਟਿੱਪਣੀ ਬਰਦਾਸ਼ਤਯੋਗ ਨਹੀਂ ਹੈ।
ਉਨ੍ਹਾਂ ਨੇ ਪੰਜਾਬ ਕਾਂਗਰਸ ਨੂੰ ਸਵਾਲ ਕਰਦੇ ਹੋਏ ਕਿਹਾ ਕਿ ਕਾਂਗਰਸ ਜਵਾਬ ਦੇਵੇ ਕੀ ਹੁਣ ਪੰਜਾਬੀ ਤੁਹਾਨੂੰ ਸੱਪ ਤੇ ਨਿਓਲਾ ਲੱਗਦੇ ਹਨ? ਬੱਲੀਏਵਾਲ ਨੇ ਕਿਹਾ ਕਿ ਕਾਂਗਰਸ ਮਹੁੱਬਤ ਦੀ ਦੁਕਾਨ ਦੇ ਝੂਠੇ ਨਾਅਰੇ ਲਗਾਉਂਦੀ ਹੈ, ਪਰ ਅਸਲ ਵਿੱਚ ਕਾਂਗਰਸੀ ਆਗੂਆਂ ਦੇ ਮਨਾਂ ਵਿੱਚ ਦਲਿਤਾਂ, ਸਿੱਖਾਂ ਤੇ ਪੰਜਾਬੀਆਂ ਨੂੰ ਲੈ ਕੇ ਸਿਰਫ਼ ਨਫ਼ਰਤ ਭਰੀ ਹੋਈ ਹੈ। ਰਾਣਾ ਕੇ.ਪੀ ਨੂੰ ਆਪਣੇ ਬਿਆਨ ਤੇ ਤਰੁੰਤ ਪੰਜਾਬੀਆਂ ਤੋਂ ਮੁਆਫੀ ਮੰਗਣੀ ਚਾਹੀਦੀ ਹੈ। ਬੱਲੀਏਵਾਲ ਨੇ ਪੰਜਾਬ ਸਰਕਾਰ ਤੋਂ ਇਸ ਬਜਟ ਵਿੱਚ ਕਾਂਗਰਸੀਆਂ ਆਗੂਆਂ ਦੇ ਇਲਾਜ਼ ਲਈ ਖਾਸ ਫ਼ੰਡ ਰੱਖਣ ਦੀ ਮੰਗ ਕੀਤੀ ਹੈ, ਜਿੰਨ੍ਹਾਂ ਦੀ ਬੁੱਧੀ ਭ੍ਰਿਸ਼ਟ ਹੋ ਚੁੱਕੀ ਹੈ।