ਮੰਡੀ- ਹਿਮਾਚਲ ਪ੍ਰਦੇਸ਼ ਦੇ ਮੰਡੀ ਜ਼ਿਲ੍ਹੇ ਦੇ ਧਰਮਪੁਰ ਉਪਮੰਡਲ ਵਿੱਚ ਪਰਛੂ ਪੁਲ ਨੇੜੇ ਮਸਨੂਈ ਝੀਲ ਬਣਨ ਨਾਲ ਹੇਠਾਂ ਵਸੇ ਪਿੰਡਾਂ ਵਿੱਚ ਚਿੰਤਾ ਦਾ ਮਾਹੌਲ ਹੈ।
ਸਥਾਨਕ ਵਸਨੀਕ ਇਸ ਸਥਿਤੀ ਲਈ ਭਾਰਤੀ ਕੌਮੀ ਰਾਜਮਾਰਗ ਅਥਾਰਟੀ (NHAI) ਵੱਲੋਂ ਨਿਰਮਾਣ ਮਲਬੇ ਦੀ ਗੈਰ-ਕਾਨੂੰਨੀ ਅਤੇ ਬਹੁਤ ਜ਼ਿਆਦਾ ਡੰਪਿੰਗ ਨੂੰ ਜ਼ਿੰਮੇਵਾਰ ਠਹਿਰਾ ਰਹੇ ਹਨ। ਉਨ੍ਹਾਂ ਦਾ ਦੋਸ਼ ਹੈ ਕਿ ਖੇਤਰ ਵਿੱਚ ਬੇਕਾਬੂ ਡੰਪਿੰਗ ਨੇ ਨਦੀ ਦੇ ਕੁਦਰਤੀ ਵਹਾਅ ਨੂੰ ਰੋਕ ਦਿੱਤਾ, ਜਿਸ ਕਾਰਨ ਇਹ ਝੀਲ ਬਣੀ ਹੈ।
ਧਰਮਪੁਰ ਅਤੇ ਸਰਕਾਘਾਟ ਦੋਵਾਂ ਦੇ ਉਪ-ਮੰਡਲ ਮੈਜਿਸਟ੍ਰੇਟ ਸਥਿਤੀ ਦਾ ਜਾਇਜ਼ਾ ਲੈਣ ਲਈ ਮੌਕੇ ’ਤੇ ਪਹੁੰਚੇ। ਧਰਮਪੁਰ ਦੇ ਉਪ-ਮੰਡਲ ਮੈਜਿਸਟ੍ਰੇਟ ਜੋਗਿੰਦਰ ਪਟਿਆਲ ਨੇ ਇਸ ਘਟਨਾ ਦੀ ਪੁਸ਼ਟੀ ਕੀਤੀ ਹੈ, ਪਰ ਵਸਨੀਕਾਂ ਨੂੰ ਭਰੋਸਾ ਦਿੱਤਾ ਕਿ ਜਾਨੀ ਜਾਂ ਮਾਲੀ ਨੁਕਸਾਨ ਨਹੀਂ ਹੋਇਆ ਹੈ।
ਐਸਡੀਐਮ ਪਟਿਆਲ ਨੇ ਕਿਹਾ, “ਘਬਰਾਉਣ ਦੀ ਕੋਈ ਲੋੜ ਨਹੀਂ। ਸਾਡੀਆਂ ਟੀਮਾਂ ਪਾਣੀ ਛੱਡਣ ਅਤੇ ਹੇਠਾਂ ਵਸੇ ਪਿੰਡਾਂ ਨੂੰ ਕਿਸੇ ਵੀ ਨੁਕਸਾਨ ਤੋਂ ਬਚਾਉਣ ਲਈ ਇੱਕ ਯੋਜਨਾਬੱਧ ਢੰਗ ਨਾਲ ਕੰਮ ਕਰ ਰਹੀਆਂ ਹਨ।”
ਉਨ੍ਹਾਂ ਕਿਹਾ ਕਿ ਵਸਨੀਕਾਂ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਅਤੇ ਕਿਸੇ ਵੀ ਸੰਭਾਵੀ ਜੋਖਮ ਨੂੰ ਘੱਟ ਕਰਨ ਲਈ ਸਾਵਧਾਨੀ ਭਰੇ ਹੱਲ ਕੀਤੇ ਜਾ ਰਹੇ ਹਨ।