ਚੰਡੀਗੜ੍ਹ- ਪੰਜਾਬੀ ਗਾਇਕ ਅਤੇ ਅਦਾਕਾਰ ਦਿਲਜੀਤ ਦੋਸਾਂਝ ਨੇ ਆਪਣੇ ਬਚਪਨ ਦੀ ਇੱਕ ਸ਼ਰਾਰਤੀ ਯਾਦ ਸਾਂਝੀ ਕੀਤੀ ਹੈ, ਜਦੋਂ ਉਨ੍ਹਾਂ ਨੇ ਪਹਿਲੀ ਵਾਰ — ਅਤੇ ਸ਼ਾਇਦ ਸਭ ਤੋਂ ਛੋਟੀ ਉਮਰ ਵਿੱਚ — ਘਰੋਂ ਭੱਜਣ ਦੀ ਕੋਸ਼ਿਸ਼ ਕੀਤੀ ਸੀ। ਉਹ ਸਿਰਫ਼ ਅੱਠ ਸਾਲ ਦੇ ਸਨ ਅਤੇ ਉਨ੍ਹਾਂ ਨੇ ਮੁਸਕਰਾਉਂਦੇ ਹੋਏ ਯਾਦ ਕੀਤਾ ਕਿ ਇਸ ਦਾ ਕਾਰਨ ਸਕੂਲ ਦਾ ਇੱਕ ਪਿਆਰ (ਕਰੱਸ਼) ਸੀ।
ਇੱਕ ਪੋਡਕਾਸਟ ‘ਤੇ ਬੋਲਦਿਆਂ, ਦਿਲਜੀਤ ਨੇ ਕਿਹਾ ਕਿ ਮੁਸੀਬਤ ਉਸ ਸਮੇਂ ਸ਼ੁਰੂ ਹੋਈ ਜਦੋਂ ਕੁਝ ਸੀਨੀਅਰ ਵਿਦਿਆਰਥੀਆਂ ਨੇ ਉਨ੍ਹਾਂ ਨੂੰ ਪੁੱਛਿਆ ਕਿ ਉਹ ਸਕੂਲ ਵਿੱਚ ਕਿਸ ਲੜਕੀ ਨੂੰ ਪਸੰਦ ਕਰਦੇ ਹਨ। ਇੱਕ ਲੜਕੀ ਵੱਲ ਇਸ਼ਾਰਾ ਕਰਨ ਤੋਂ ਬਾਅਦ, ਸੀਨੀਅਰਾਂ ਨੇ ਉਨ੍ਹਾਂ ਨੂੰ ਮਜ਼ਾਕ ਵਿੱਚ ਕਿਹਾ ਕਿ ਉਨ੍ਹਾਂ ਨੂੰ ਉਸ ਨਾਲ ਵਿਆਹ ਕਰਨਾ ਪਵੇਗਾ।
ਦਿਲਜੀਤ ਨੇ ਯਾਦ ਕਰਦਿਆਂ ਕਿਹਾ, “ਡਨ,” ਅਤੇ ਦੱਸਿਆ ਕਿ ਉਹ ਫਿਰ ਉਸ ਲੜਕੀ ਕੋਲ ਗਏ ਅਤੇ ਉਸ ਨੂੰ ਕਿਹਾ ਕਿ ਉਹ ਵਿਆਹ ਕਰਨਗੇ ਕਿਉਂਕਿ ਉਹ ਉਸ ਨੂੰ ਪਸੰਦ ਕਰਦੇ ਹਨ। ਪਰ ਪ੍ਰਸਤਾਵ ਉਸ ਤਰ੍ਹਾਂ ਨਹੀਂ ਹੋਇਆ ਜਿਵੇਂ ਯੋਜਨਾ ਬਣਾਈ ਗਈ ਸੀ। ਲੜਕੀ ਨੇ ਜਾ ਕੇ ਅਧਿਆਪਕ ਨੂੰ ਦੱਸ ਦਿੱਤਾ। ਦਿਲਜੀਤ ਨੂੰ ਅਗਲੀ ਗੱਲ ਇਹ ਪਤਾ ਲੱਗੀ ਕਿ ਉਨ੍ਹਾਂ ਨੂੰ ਆਪਣੇ ਮਾਪਿਆਂ ਨੂੰ ਸਕੂਲ ਲਿਆਉਣ ਲਈ ਕਿਹਾ ਗਿਆ ਸੀ।
ਦਿਲਜੀਤ ਨੇ ਬਚਪਨ ਵਿੱਚ ਮਹਿਸੂਸ ਹੋਈ ਘਬਰਾਹਟ ਨੂੰ ਯਾਦ ਕਰਦਿਆਂ ਕਿਹਾ, “ਮੈਨੂੰ ਲੱਗਿਆ, ‘ਅਬ ਦੁਨੀਆ ਖਤਮ, ਅਬ ਤੋ ਗਿਆ। ਅਬ ਮੈਂ ਗਿਆ।(ਹੁਣ ਤਾਂ ਦੁਨੀਆ ਖ਼ਤਮ, ਹੁਣ ਤਾਂ ਮੈਂ ਗਿਆ )’ “
ਅਟੱਲ ਮੁਲਾਕਾਤ ਤੋਂ ਬਚਣ ਲਈ ਦ੍ਰਿੜ ਇਰਾਦੇ ਨਾਲ, ਅੱਠ ਸਾਲ ਦੇ ਬੱਚੇ ਨੇ ਚੁੱਪਚਾਪ ਫਰਿੱਜ ਵਿੱਚੋਂ ਦੋ ਕੇਲੇ ਅਤੇ ਕੁਝ ਫਲ ਚੁੱਕੇ, ਆਪਣੀ ਸਾਈਕਲ ਲਈ ਅਤੇ ਕਿਸੇ ਨੂੰ ਦੱਸੇ ਬਿਨਾਂ ਘਰੋਂ ਨਿਕਲ ਗਏ। ਦਿਲਜੀਤ ਨੇ ਕਿਹਾ ਕਿ ਇਹ ਪਹਿਲੀ ਵਾਰ ਸੀ, ਜਦੋਂ ਉਹ ਬਿਨਾਂ ਇਜਾਜ਼ਤ ਦੇ ਇਕੱਲਾ ਬਾਹਰ ਗਿਆ ਸੀ।
ਦਿਲਜੀਤ ਖੇਤਾਂ ਵੱਲ ਮੁਸ਼ਕਿਲ ਨਾਲ ਪੰਜ ਮਿੰਟ ਹੀ ਸਾਈਕਲ ਚਲਾ ਕੇ ਗਿਆ ਸੀ ਕਿ ਉਨ੍ਹਾਂ ਦੇ ਪਿੰਡ ਦੇ ਇੱਕ ਵਿਅਕਤੀ ਨੇ ਉਨ੍ਹਾਂ ਨੂੰ ਦੇਖ ਲਿਆ। ਪਿੰਡ ਵਾਸੀ ਨੇ ਦਿਲਜੀਤ ਨੂੰ ਪੁੱਛਿਆ ਕਿ ਉਹ ਕਿੱਥੇ ਜਾ ਰਿਹਾ ਹੈ ਅਤੇ ਘਰ ਵਾਪਸ ਜਾਣ ਲਈ ਕਹਿੰਦਿਆਂ ਕਿਹਾ, “ਕਿੱਥੇ ਤੁਰਿਆ ਫਿਰਦਾ ਤੂੰ? ਚੱਲ ਵਾਪਸ ਮੁੜ ਜਾ।” ਉਨ੍ਹਾਂ ਕਿਹਾ, ” ਪਹਿਲਾਂ ਅਜਿਹਾ ਹੁੰਦਾ ਸੀ ਕਿ ਪਿੰਡ ਦੇ ਸਭ ਲੋਕ ਆਪਣੇ ਹੁੰਦੇ ਸਨ ਪਰ ਹੁਣ ਸ਼ਹਿਰਾਂ ਵਿੱਚ ਕੋਈ ਕਿਸੇ ਦੇ ਬੱਚੇ ਨੂੰ ਕੁੱਝ ਨਹੀਂ ਕਹਿ ਸਕਦਾ।”
ਉਨ੍ਹਾਂ ਨੇ ਯਾਦ ਕੀਤਾ ਕਿ ਪਹਿਲਾਂ, ਜੇ ਪਿੰਡ ਵਿੱਚ ਕੋਈ ਵੱਡਾ ਬੱਚੇ ਨੂੰ ਝਿੜਕ ਵੀ ਦਿੰਦਾ ਜਾਂ ਥੱਪੜ ਮਾਰ ਦਿੰਦਾ ਸੀ, ਤਾਂ ਪਰਿਵਾਰ ਆਮ ਤੌਰ ‘ਤੇ ਇਸ ਨੂੰ ਟਕਰਾਅ ਨਹੀਂ ਬਣਾਉਂਦੇ ਸਨ। ਉਨ੍ਹਾਂ ਕਿਹਾ ਕਿ ਅੱਜ, ਮਾਪੇ ਅਤੇ ਬੱਚੇ ਬੁਰਾ ਮਨਾ ਸਕਦੇ ਹਨ ਜਦੋਂ ਕੋਈ ਹੋਰ ਬੱਚੇ ਦੇ ਵਿਵਹਾਰ ‘ਤੇ ਸਵਾਲ ਉਠਾਉਂਦਾ ਹੈ। ਪਿੰਡ ਵਾਸੀ ਵੱਲੋਂ ਵਾਪਸ ਭੇਜਣ ਤੋਂ ਬਾਅਦ, ਦਿਲਜੀਤ ਘਰ ਪਰਤ ਆਏ ਪਰ ਉਨ੍ਹਾਂ ਨੇ ਸਕੂਲ ਦਾ ਬੁਲਾਵਾ ਆਪਣੇ ਤੱਕ ਹੀ ਰੱਖਿਆ। ਫਿਰ ਉਸ ਨੇ ਅਗਲੇ ਦੋ ਦਿਨਾਂ ਤੱਕ ਇਸ ਬਹਾਨੇ ਨਾਲ ਸਕੂਲ ਜਾਣ ਤੋਂ ਪਰਹੇਜ਼ ਕੀਤਾ ਕਿ ਉਨ੍ਹਾਂ ਦੇ ਪੇਟ ਵਿੱਚ ਦਰਦ ਹੈ। ਗੌਰਤਲਬ ਹੈ ਕਿ ਦਿਲਜੀਤ ਦੋਸਾਂਝ ਆਪਣੇ ਰੁਪੇ ਔਰਾ ਇੰਡੀਆ ਟੂਰ (RuPay Aura India Tour) ਦੇ ਹਿੱਸੇ ਵਜੋਂ 12 ਦਸੰਬਰ ਨੂੰ ਚੰਡੀਗੜ੍ਹ ਵਿੱਚ ਸ਼ੋਅ ਕਰਨ ਜਾ ਰਿਹਾ ਹੈ।