ਨਵੀਂ ਦਿੱਲੀ- ਦਿੱਲੀ ਵਿੱਚ ਬੈਂਕ ਨਾਲ ਕੀਤੀ ਗਈ ਇੱਕ ਸ਼ਾਤਿਰਾਨਾ ਠੱਗੀ ਵਿੱਚ ਦੋ ਠੱਗਾਂ ਨੇ ਇੱਕ ਕਾਰਪੋਰੇਟ ਡਾਇਰੈਕਟਰ ਬਣ ਕੇ ਬੈਂਕ ਅਧਿਕਾਰੀਆਂ ਦਾ ਵਿਸ਼ਵਾਸ ਜਿੱਤਣ ਲਈ 1 ਕਰੋੜ ਰੁਪਏ ਦੀ ਐੱਫਡੀ ਬਾਰੇ ਗੱਲਬਾਤ ਕੀਤੀ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਕੰਪਨੀ ਦੇ ਫਰਜ਼ੀ ਲੈਟਰਹੈੱਡ ਅਤੇ ਈਮੇਲ ਆਈਡੀਜ਼ ਦੀ ਵਰਤੋਂ ਕਰਕੇ 22.56 ਲੱਖ ਰੁਪਏ ਇੱਕ ਫਰਜ਼ੀ ਖਾਤੇ ਵਿੱਚ ਟਰਾਂਸਫਰ ਕਰਵਾ ਲਏ। ਦਿੱਲੀ ਪੁਲੀਸ ਨੇ ਇਸ ਮਾਮਲੇ ’ਚ ਦੋ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰਕੇ 2.5 ਕਰੋੜ ਰੁਪਏ ਦੀ ਜਾਇਦਾਦ ਜ਼ਬਤ ਕੀਤੀ ਹੈ, ਜਿਸ ਵਿੱਚ 101 ਸੋਨੇ ਦੇ ਸਿੱਕੇ, 17 ਸੋਨੇ ਦੀਆਂ ਚੇਨਾਂ, ਗਹਿਣੇ, ਨਕਦੀ ਅਤੇ ਇੱਕ ਨਵੀਂ ਮਹਿੰਦਰਾ ਥਾਰ ਰੌਕਸ ਸ਼ਾਮਲ ਹੈ। ਗ੍ਰਿਫ਼ਤਾਰ ਮੁਲਜ਼ਮਾਂ ਵਿੱਚੋਂ ਵਿਨੈ ਕੁਮਾਰ ਯਾਦਵ (36), ਵਾਸੀ ਲੋਨੀ (ਗਾਜ਼ੀਆਬਾਦ), ਨਕਲੀ ਕਰੰਸੀ ਦੇ ਮਾਮਲੇ ਵਿੱਚ 7 ਸਾਲਾਂ ਤੋਂ ਭਗੌੜਾ ਸੀ। ਦੂਜੇ ਮੁਲਜ਼ਮ ਅਨਿਲ ਕੁਮਾਰ ਸਹਿਗਲ (65), ਵਾਸੀ ਨੋਇਡਾ, ਨੂੰ ਤਕਨੀਕੀ ਜਾਂਚ ਤੋਂ ਬਾਅਦ ਕਾਬੂ ਕੀਤਾ ਗਿਆ।
ਇਹ ਮਾਮਲਾ ਬੈਂਕ ਆਫ਼ ਇੰਡੀਆ, ਰਾਜੇਂਦਰ ਪਲੇਸ ਦੇ ਬਰਾਂਚ ਮੈਨੇਜਰ ਦੀ ਸ਼ਿਕਾਇਤ ਤੋਂ ਬਾਅਦ ਸਾਹਮਣੇ ਆਇਆ। 5 ਅਗਸਤ ਨੂੰ ਫੋਨ ਕਰਨ ਵਾਲੇ ਨੇ ਖਾਤੇ ਵਾਲੀ ਕੰਪਨੀ ਦਾ ਡਾਇਰੈਕਟਰ ਦੀਪਕ ਮਲਹੋਤਰਾ ਬਣ ਕੇ ਬੈਂਕ ਅਧਿਕਾਰੀ ਨਾਲ ਗੱਲ ਕੀਤੀ। ਭਰੋਸਾ ਜਿੱਤਣ ਲਈ ਉਸ ਨੇ ਪਹਿਲਾਂ 1 ਕਰੋੜ ਦੀ ਐੱਫਡੀ ਬਣਾਉਣ ਅਤੇ ਫਿਰ ਦੂਜੇ ਬੈਂਕਾਂ ’ਚ ਵੱਧ ਵਿਆਜ ਮਿਲਣ ਦੀ ਗੱਲ ਕਹੀ। ਬਾਅਦ ਵਿੱਚ ਉਸ ਨੇ ਚੈੱਕ ਬੁੱਕ ਖਤਮ ਹੋਣ ਦਾ ਬਹਾਨਾ ਬਣਾ ਕੇ ਈਮੇਲ ਰਾਹੀਂ ਭੁਗਤਾਨ ਕਰਨ ਲਈ ਕਿਹਾ। ਉਸ ਨੇ ਕੰਪਨੀ ਦੀ ਰਜਿਸਟਰਡ ਆਈਡੀ ਵਰਗੀ ਨਕਲੀ ਈਮੇਲ ਅਤੇ ਫਰਜ਼ੀ ਲੈਟਰਹੈੱਡ ਭੇਜ ਕੇ 22.56 ਲੱਖ ਰੁਪਏ ਟਰਾਂਸਫਰ ਕਰਨ ਲਈ ਕਿਹਾ। ਜਦੋਂ ਅਧਿਕਾਰੀਆਂ ਨੇ ਦਸਤਾਵੇਜ਼ ਮੰਗੇ, ਤਾਂ ਉਸ ਨੇ ਜਲਦਬਾਜ਼ੀ ਦਾ ਦਬਾਅ ਪਾਇਆ, ਜਿਸ ’ਤੇ ਬੈਂਕ ਨੇ ਆਰ.ਟੀ.ਜੀ.ਐੱਸ. ਕਰ ਦਿੱਤਾ।
ਸਾਇਬਰ ਪੁਲੀਸ ਸਟੇਸ਼ਨ ਵਿੱਚ BNS ਦੀਆਂ ਧਾਰਾਵਾਂ 318(4), 319 ਅਤੇ 340 ਤਹਿਤ ਈ-ਐੱਫ.ਆਈ.ਆਰ. ਦਰਜ ਕੀਤੀ ਗਈ। ਜਾਂਚ ਤੋਂ ਪਤਾ ਲੱਗਾ ਕਿ ਇਹ ਰਕਮ ਪੱਛਮੀ ਬੰਗਾਲ ਦੇ ਬੰਧਨ ਬੈਂਕ ਦੇ ਇੱਕ ਮਿਊਲ (ਫਰਜ਼ੀ) ਖਾਤੇ ਵਿੱਚ ਗਈ ਸੀ। ਪੁਲੀਸ ਨੇ ਟੈਲੀਕਾਮ ਅਤੇ ਡਿਜੀਟਲ ਸਬੂਤਾਂ ਦੇ ਆਧਾਰ ’ਤੇ ਦੋਵਾਂ ਨੂੰ ਗ੍ਰਿਫ਼ਤਾਰ ਕੀਤਾ। ਜਾਂਚ ਵਿੱਚ ਇਸ ਠੱਗੀ ਦੇ ਤਾਰ ਪੱਛਮੀ ਬੰਗਾਲ ਅਤੇ ਬਿਹਾਰ ਦੇ ਸਹਿਯੋਗੀਆਂ ਨਾਲ ਵੀ ਜੁੜੇ ਹੋਣ ਦਾ ਖੁਲਾਸਾ ਹੋਇਆ ਹੈ।